Qarabağla bağlı “şirnikləndirici” təklifin səbəbi

Mövcud şərtlər və son hadisələr fonunda danışıqlarla bağlı istənilən xəbəri ciddiyə almamalıyıq. Çünki Ermənistan-Azərbaycan Dağlıq Qarabağ münaqişəsinin danışıqlar yolu ilə həlli variantı yoxdur. Əgər həmsədrlər Azərbaycanı danışıqlar masasına yenidən oturtmaq istəyirsə, mütləq əsaslı təklif irəli sürməlidirlər.

Bu sözləri Axar.az-a açıqlamasında sabiq Xarici İşlər naziri, politoloq Tofiq Zülfüqarov Qarabağdakı qondarma rejimin “təhlükəsizlik şurası”nın keçmiş rəhbəri Vitali Balasanyanın Ermənistan Baş naziri Nikol Paşinyanın konfliktin “mərhələli həll” variantına qayıtması haqda fikirlərini şərh edərkən deyib. Politoloq bildirib ki, bu xəbəri ciddiyə almaq doğru deyil:

“Bəli, faktiki olaraq Vitali Balasanyanın dediyi kimi, 2007-ci il strategiyasında Dağlıq Qarabağ “respublika kimi” təqdim edilib, indi isə yeni strategiyada “respublika” sözündən imtina edilib. Lakin bu, heç də Paşinyanın “mərhələli həll” variantına qayıtdığı mənasına gəlmir. Bunun bir adı var, o da Ermənistan klanı ilə Dağlıq Qarabağ klanı arasında olan ziddiyyət! Biz onsuz da bilirik ki, bu iki klan arasında rəqabət gedir. Düşünürəm, Vitali Balasanyanın iddiasındansa, İrəvan klanı ilə Dağlıq Qarabağ klanının bir-biri ilə düşmən olması bizi daha çox maraqlandırmalıdır”.

Politoloq qeyd edib ki, həmsədrlər məlum Tovuz hadisələrindən sonra tərəfləri danışıqlar prosesinə qaytarmaq üçün münbit şərait yaratmağa çalışırlar:

“Bu gün Rusiya Xarici İşlər Nazirliyi belə bir bəyanat verdi ki, Ermənistan-Azərbaycan Dağlıq Qarabağ münaqişəsi Madrid prinsipləri ilə həll edilməlidir. Göründüyü kimi, bu və bu kimi şirnikləşdirici məlumatlarla tərəfləri danışıqlar masasına yenidən qaytarmağa çalışırlar. Lakin son Tovuz hadisələri bir daha onu göstərdi ki, Ermənistan tərəfinin birmənalı olaraq danışıqlar prosesinə marağı yoxdur. Əks təqdirdə, dövlət sərhədində təxribat törətməzdilər. Bu özlüyündə danışıqlar variantının iflas olması və bərpa olunmaması üçün əsasdır”.