Gündəm, Cəmiyyət, İdman
06 yanvar 2022
25

Prezident İlham Əliyevin idmana diqqət və qayğısı əvəzolunmazdır

Prezident İlham Əliyevin idmana diqqət və qayğısı əvəzolunmazdır
Ulu öndərin təşəbbüsü əsasında qəbul olunmuş "Bədən tərbiyəsi və idman haqqında", "Dövlət gənclər siyasəti haqqında" qanunlar Azərbaycan idmanının inkişafına ciddi təkan vermişdi. Bu qanunların yaratdığı imkanlar idmançıların yaşayış səviyyəsinin, təlim-məşq şəraitinin ildən-ilə yaxşılaşdırılmasına da real zəmin yaratdı. Azərbaycan xalqının mənafeyinə əsaslanan bu siyasəti 2003-cü ilin oktyabrından Azərbaycan Prezidenti İlham Əliyev inamla davam etdirir. Cənab İlham Əliyevin bu sahədə gördüyü işlərin son 18 illə məhdudlaşmadığı da xüsusi vurğulanmalıdır.
Ölkə başçısı Müzəffər Ali Baş Komandan İlham Əliyev cənabları idmana, bədən tərbiyəsinə diqqəti ildən-ilə daha da artırır, idmançılarımızın beynəlxalq arenalarda qazandığı nailiyyətlər buna bariz nümunədir. "Ümummilli lider Heydər Əliyev ölkəmizdə idmanın və bədən tərbiyəsinin inkişafına daim diqqət göstərib. Ulu Öndərimizin layiqli davamçısı, dövlətimizin başçısı cənab İlham Əliyev də idmana, onun inkişafına hər zaman həssaslıqla yanaşır. Azərbaycan Respublikasının Prezidenti İlham Əliyevin 2005-ci il martın 4-də "Bədən tərbiyəsi və idman günü"nün təsis edilməsi haqqında Sərəncam imzalaması idmana xüsusi diqqətin təsdiqidir. Dövlət başçısının idmanı sevməsi, idmançılara xüsusi həssaslıqla yanaşması, onların peşəkar səviyyədə hazırlanmasına göstərdiyi davamlı qayğı, idmanın maddi-texniki bazasının möhkəmləndirilməsi, olimpiya idman komplekslərinin və idman bazalarının yaradılması haqqında qərarları buna əyani sübutdur. Bu qərarlar daim müsbət nəticələr verir, olimpiya və dünya çempionatlarında qazanılan müvəffəqiyyətlər yüksələn xətlə gedir. İndi nəinki Bakıda, ölkəmizin bütün bölgələrində müasir olimpiya idman kompleksləri tikilib, idman mərkəzləri uğurla fəaliyyət göstərir".
Xatırlatmaq lazımdır ki, hələ 1997-ci ildə Azərbaycan Milli Olimpiya Komitəsinin (MOK) prezidenti vəzifəsinə İlham Əliyev kimi idarəçi və təşkilatçı bir şəxsin seçilməsi idman və gənclər siyasətinin yeni şəraitdə gerçəkləşməsinə böyük imkanlar açdı. MOK-un prezidenti cənab İlham Əliyev ölkədə olimpiya hərəkatının genişlənməsi, idmanın və bədən tərbiyəsinin tərəqqisi, daha geniş coğrafi məkanda təbliği, habelə Azərbaycanın dünya idman ailəsinin bərabərhüquqlu üzvünə çevrilməsi üçün ciddi tədbirlər həyata keçirdi. İdmana dövlət qayğısı ilə yanaşı, onun maddi-texniki bazasının möhkəmləndirilməsi yolunda da işlər görüldü. Bu sahəyə göstərilən diqqət və qayğı Azərbaycanın milli genefondunun qorunması, habelə gənclərin vətənpərvər və sağlam ruhda tərbiyə edilməsi məqsədindən irəli gəlirdi.
Cənab İlham Əliyevin şəxsi təşəbbüsü və təşkilatçılığı ilə 2000-ci ildən Azərbaycanın müxtəlif bölgələrində ümumilikdə 20-yə yaxın müasir tipli olimpiya kompleksi inşa olunub. Son 15 ildə Naxçıvanda, Gəncədə, Şəkidə, Bərdədə, Lənkəranda, Qubada, Zaqatalada, Masallıda, Qazaxda, Şamaxıda, Tovuzda, Salyanda, Yevlaxda və digər rayonlarda dünya standartlarına uyğun olimpiya-idman kompleksləri tikilərək idmançıların istifadəsinə verilib. Bütün bunlar da gənc nəslin sağlam ruhda tərbiyəsinə, respublikamızda idmanın kütləviləşməsinə xidmət edir.
Azərbaycanda idman və gənclər siyasətinin düzgün qurulduğunu bu sahədə qazanılmış uğurlu nəticələr də təsdiqləyir. Bir vaxtlar maddi çətinliklər üzündən respublikamızı tərk etmiş neçə-neçə gənc geri qayıdaraq ölkəmizin idman şərəfini uca tutub, üçrəngli bayrağımızı göylərə qaldırıb. Artıq neçə vaxtdır ki, respublikamızda beynəlxalq səviyyəli yarışlar təşkil olunur, idmançılarımız hər il müxtəlif növlər üzrə keçirilən Avropa və dünya çempionatlarına qatılaraq uğurlu nəticələr göstərirlər. Azərbaycan müxtəlif beynəlxalq idman yarışlarının keçirildiyi nüfuzlu məkana çevrilir. Dövlət başçısı İlham Əliyevin əksər hallarda bu yarışları əyani surətdə izləməsi, idmançılarımıza mənəvi və maddi dəstək verməsi, onları ruhlandırması da vacib məqam kimi vurğulanmalıdır.
Azərbaycanda idmançıların sosial vəziyyətinin, mənzil-məişət şəraitinin yaxşılaşdırılması istiqamətində də ardıcıl addımlar atılır. Yəqin çoxları bu fikirlə razılaşar ki, ölkədə heç zaman idmana və idmançılara bu cür yüksək diqqət, qayğı olmayıb. Prezident çıxışlarında qeyd edib ki, idmançılarımız sağlamlığını və gənclik illərini böyük idmana qurban verdilər. Mən onlara həmişə dayaq olacağam" deyən dövlət başçısı idmançılara hörmətini ifadə etmişdir. Həqiqətən də obyektiv səbəblərdən bu gün idmandan uzaqlaşan insanlar dövlət başçısının diqqət və qayğısını aşkar hiss edirlər.
Cənab İlham Əliyev idmana yüksək qayğının nümunəsi kimi idmançılar üçün Prezident təqaüdü, dövlət başçısının göstərişi əsasında isə Milli Olimpiya Komitəsi respublikanın adlı-sanlı idmançıları üçün aylıq təqaüd təsis etmişdir. Hər ilin yekunlarına görə 20-dən çox idmançıya mənzillər və digər mükafatlar verilir, idman mütəxəssislərinə, məşqçilərə böyük həcmdə yardım göstərilir. Prezident İlham Əliyev qazanılmış idman nailiyyətlərinin nümayiş etdirilməsi ilə yanaşı, idman tarixinin öyrənilməsi və təbliği, gənc nəslə sağlam həyat tərzi vərdişlərinin aşılanması, onların milli-mənəvi dəyərlər ruhunda tərbiyə olunması istiqamətində də kompleks tədbirlər həyata keçirir.
Ümumbəşəri dəyərlərin tərkib hissəsi kimi, Azərbaycanda idman və bədən tərbiyəsinin kütləviləşməsinə mühüm önəm verilir. Eyni zamanda rəhbərliyinin peşəkarlığı, təşkilatçılıq məharəti, qətiyyəti, iradəsi, qarşıya qoyulmuş məqsəd və vəzifəyə doğru addım-addım, təmkinlə irəliləmək bacarığı sayəsində Azərbaycan idmanı özünün yüksəliş dövrünü yaşayır. Ölkə Prezidentinin böyük diqqət və qayğısı idmançılarımızı yeni-yeni qələbələrə ruhlandırır.

Prezident İlham Əliyevin idmana diqqət və qayğısı əvəzolunmazdır
Fuad Hacı oğlu Hacıyev
Azərbaycan Dövlət Bədən Tərbiyəsi və İdman Akademiyasının rektoru