Vətənpərvər iş xanımı Zərniyar Kərimova – “Günəş qədər parlaq ürək sahibi”

Vətən sevgisi insanın qanında, ruhunda və davranışlarında özünü göstərir. Elə insanlar var ki, onların yaşamaq tərzi, düşüncə tərzi, atdığı hər addım birbaşa vətənə, xalqa və dövlətə xidmətin ifadəsidir. Belə insanlar cəmiyyətin ruhudur, dayağıdır, işıq saçan mayaklarıdır. Onlardan biri də vətənpərvər iş xanımı, xeyirxahlıq və mərhəmət simvolu olan Zərniyar Kərimovadır.
Bu gün Azərbaycan cəmiyyətində elə qadınlar var ki, həm uğurlu biznes sahibləri, həm də mərhəmətli bir ana, sosial fəal və vətənə sədaqətli vətəndaş kimi nümunə göstərilirlər. Zərniyar xanım məhz belə qadınlardandır – o, yalnız işgüzar dünyada deyil, insanlıq aləmində də öz nümunəsi ilə seçilən şəxsiyyətdir.
Zərniyar Kərimova sadəcə bir iş xanımı deyil. O, həyatını insanlara xidmətə həsr edən, qazandığını ehtiyacı olanlarla bölüşməkdən çəkinməyən, səssiz dərdlərə səssizcə əl uzadan bir şəxsiyyətdir. Onun adı bu gün təkcə peşəkar sahibkar kimi deyil, eyni zamanda şəhid ailələrinin, qazilərin, yaşlıların, yetimlərin və ehtiyacı olan insanların ən yaxın dostu kimi çəkilir.
Zərniyar xanımın həyat fəlsəfəsinin mərkəzində bir düşüncə dayanır: "Əgər Allah sənə imkan veribsə, bu imkanı paylaşmalısan". O, sadə ailədən çıxmış, əməklə, zəhmətlə yüksəlmiş, vətəninə və xalqına borclu olduğunu heç vaxt unutmamış qadındır.
Zərniyar xanımı tanıyanlar üçün “günəş qədər parlaq ürək sahibi” ifadəsi sadəcə poetik deyil, tam gerçək və həyatın özü qədər aydındır. O, insanlara nur saçan, ümid verən, istilik bəxş edən bir ürəyə sahibdir. Zərniyar xanımın simasında biz həm güclü qadını, həm qayğıkeş ananı, həm də xalqına, dövlətinə sadiq vətəndaşı görürük.
Zərniyar xanım bu illər ərzində yüzlərlə aztəminatlı ailəyə yardım edib. Şəhid ailələrinin, qazilərin evlərinə baş çəkib, onların dərdlərinə şərik olub, əllərindən tutub, həyatlarına işıq salıb. Ən çətin günlərdə belə geri addım atmayan, hər zaman insanların yanında olan bu qadın, cəmiyyətin bütün təbəqələrinin rəğbətini qazanıb.
Zərniyar Kərimova üçün şəhid ailələri və qazilər müqəddəs bir dəyərdir. O, şəhid analarını öz anası kimi görür, onların göz yaşına laqeyd qala bilmir. Zaman-zaman təşkil etdiyi yardım kampaniyaları, mənəvi dəstək səfərləri, bayram günlərində şəhid ailələrinə göstərdiyi qayğı onun nə qədər səmimi, vicdanlı və humanist biri olduğunu sübut edir.
“Şəhidlər bizim baş tacımızdır. Onların ailələri hər birimizin ailəsidir. Biz onların qarşısında borcluyuq,” – deyən Zərniyar xanım, bu sözləri sadəcə dilə gətirmir, həyatında tam şəkildə tətbiq edir.
Zərniyar Kərimovanın fəaliyyətində xeyriyyəçilik yalnız konkret aksiyalarla məhdudlaşmır. Onun üçün bu, bir həyat tərzidir. O, ehtiyacı olan hər bir insana yardım etməyi insanlıq borcu sayır. Bu, onun tərbiyəsindən, mənəvi köklərindən, milli-mənəvi dəyərlərə olan bağlılığından qaynaqlanır.
O, bir çox hallarda etdiyi yaxşılıqları ictimailəşdirmir, sadəcə kömək etdiyi insanların xoşbəxt baxışları onun üçün ən böyük mükafat olur. Bu isə Zərniyar xanımın səmimiliyinin, təvazökarlığının və daxili zənginliyinin bariz göstəricisidir.
Zərniyar xanımın vətənpərvərliyi onun sözlərində yox, əməllərində təzahür edir. O, hər zaman Prezident İlham Əliyevin apardığı daxili və xarici siyasəti dəstəkləyib, dövlətin yanında olduğunu açıq şəkildə bildirib. Dövlətə bağlılıq, milli maraqlara sadiqlik onun şəxsi kimliyinin ayrılmaz hissəsidir.
"Bizim bu gün azad, güclü və müstəqil dövlətimiz varsa, bu, Prezidentimizin qətiyyətli siyasəti və xalqımızın birliyi sayəsindədir. Mən bir Azərbaycan qadını olaraq bu ölkənin inkişafına töhfə verməyə borcluyam,” – deyə Zərniyar Kərimova bildirir.
Zərniyar xanım iş dünyasında da öz prinsipləri və dürüstlüyü ilə tanınır. O, kişi hegemonluğunun müşahidə olunduğu biznes sahəsində öz zəhməti, bacarığı və dürüst münasibəti ilə nüfuz qazanıb. Əməkdaşlarına qarşı humanist yanaşma, şəffaflıq və məsuliyyət onun rəhbərlik etdiyi sahənin əsas prinsipləridir.
O, qadınların iqtisadi fəallığının artmasını vacib sayır və gənc xanımlara dəstək verir. Zərniyar Kərimova hesab edir ki, hər bir qadın öz gücünə inanarsa, bütün çətinliklərin öhdəsindən gələ bilər. Onun timsalında Azərbaycan qadını həm güclü sahibkar, həm də mənəvi dayaq kimi təcəssüm edir.
Zərniyar xanımın fəaliyyəti yalnız bu günlə məhdudlaşmır – o, gələcəyə baxır, gənc nəslin vətənpərvər, mərhəmətli, bilikli və bacarıqlı yetişməsi üçün çalışır. Onun təşkil etdiyi tədbirlərdə, söhbətlərində hər zaman bir əsas məqam vurğulanır: vətənini sev, insanlara dəyər ver, ədalətli ol.
O, bir çox məktəblərdə, gənclər təşkilatlarında çıxışlar edir, gənclərə motivasiya verir, onları öz üzərlərində çalışmağa, məsuliyyətli və vətənə bağlı vətəndaş olmağa təşviq edir. Zərniyar xanım üçün insan yetişdirmək, gələcək nəsli formalaşdırmaq ən yüksək missiyalardan biridir.
Əgər bir cəmiyyətdə qadınlar güclüdürsə, o cəmiyyət inkişaf etməyə, tərəqqi etməyə məhkumdur. Zərniyar Kərimova bu fikri hər addımı ilə təsdiqləyir. O, Azərbaycan qadınının zəhmətkeşliyini, mərhəmətini, cəsarətini və iradəsini öz həyatında yaşadır. Bu xüsusiyyətləri ilə o, təkcə bir fərd olaraq deyil, bütöv bir qadın zümrəsinin təmsilçisi kimi hörmət qazanıb.
Zərniyar Kərimova haqqında deyiləcək sözlər çoxdur. Onun fəaliyyəti, düşüncəsi və insani keyfiyyətləri uzun-uzadı yazılmağa, təqdir olunmağa dəyər. O, müasir Azərbaycan qadınının canlı nümunəsidir – həm müdrik, həm mərhəmətli, həm də cəsur. O, vətənini sevən, xalqını sevən, insanlara işıq saçan “günəş qədər parlaq ürək sahibi” bir şəxsiyyətdir.
Belə qadınlarla Azərbaycanın gələcəyi daha parlaqdır.


Dilşad Əhmədova
Baş redaktor