Cəlal İsayevdən HƏYƏCAN TƏBİLİ: “Yoluxan şagirdlər..."

Dərs ili başlayandan bu günədək 95 şagird və 26 işçi heyəti olmaqla 121 nəfərdə koronavirus aşkarlanması faktı kifayət qədər çoxdur. Bunun qarşısını almaq üçün mütləq əlavə tədbirlər görülməlidir.

Ölkə.Az xəbər verir ki, bu sözləri Oxu.Az-a Azərbaycanın baş infeksionisti Cəlal İsayev deyib. O bildirib ki, aşağı siniflərdə koronavirus adətən subklinik səviyyədə keçir ki, bu da onlar üçün xüsusi təhlükə yaratmır:

“Təbii ki, onlara heç bir təhlükə yaratmasa da, daşıyıcı kimi bizim üçün çox böyük təhlükədirlər. Onlar virusu ifraz edir və bu nöqteyi-nəzərdən heç bir kliniki əlamət olmadan cəmiyyətdə dolaşaraq virusu yayırlar. Ona görə də bu məqamın ciddi təhlükə olmasını nəzərə alıb yeni mexanizmlər hazırlanmalıdır. Bu rəqəmlər kifayət qədər çoxdur və yoluxmanın qarşısını almaq üçün mütləq əlavə tədbirlər görülməlidir”.

C.İsayev onu da əlavə edib ki, təkcə aşağı sinif şagirdləri deyil, regionlarda yuxarı sinif şagirdləri də yoluxub:

“Burada valideynlərin üzərinə ciddi məsuliyyət düşür. Onların maska taxması tələb olunmalıdır. Eyni zamanda müəllimlərin də səhlənkar davranışları yoluxmalara şərait yaradıb. Şagirdlərə qısa tənəffüs vaxtı ayırıb onların bir-biri ilə sıx ünsiyyətinin qarşısını almaq lazımdır. Təəssüf ki, ibtidai siniflərdə onlayn dərs keçilməsi effekt verməz. Uşaqların gələcəyi üçün də təhsilin dayandırılması düzgün deyil. Ayrı bir mexanizm düşünülməli, tədbirlər görülməlidir. Bakıda sinifdə yoluxma halı çox olub və 4 sinif bağlanıb. Bu məsələ ilə bağlı kollegial müzakirə aparılmalı və tez bir zamanda qərar qəbul olunmalıdır”.