Gündəm, Bölgə
23 dekabr 2020
1011
Əziz Əzizov da istintaqa cəlb ediləcəkmi? – Suraxanının yeni, Cəlilabadın köhnə icra başçısından çoxsaylı şikayətlər var...
Dekabrın 7-də Dövlət Təhlükəsziliyi Xidməti (DTX) Cəlilabad Rayon İcra Hakimiyyətində əməliyyat keçirib və icra başçısı Namiq Zeynalovu həbs edib. N.Zeynalov Cinayət Məcəlləsinin 179.2.2 (Mənimsəmə və ya israf etmə təkrar törədildikdə) 179.2.3 (şəxs tərəfindən öz qulluq mövqeyindən istifadə etməklə törədildikdə); 179.2.4 (xeyli miqdarda ziyan vurmaqla törədildikdə), 308.2 (Vəzifə səlahiyyətlərindən sui-istifadə), 311.3.3 (külli miqdarda rüşvət alma), 311.3.2 (təkrar rüşvət alma), 313-cü (Vəzifə saxtakarlığı) maddələri ilə ittiham olunur.
Onun barəsində Səbail rayon Məhkəməsi 4 aylıq həbs qətimkan tədbiri seçib. Prezident İlham Əliyevin Sərəncamı ilə N. Zeynalov Cəlilabad Rayon İcra Hakimiyyətinin başçısı vəzifəsindən azad edilib.
Xatırladaq ki, Cəlilabad rayon icra hakimiyyətinin başçısı Namiq Zeynalov 2018-ci ilin fevralın 6-dan bu vəzifədə çalışır. Bu rayon əvvəldən icra başçısı sarıdan bəxti gətirməyib. Rayona müxtəlif vaxtlarda rəhbərlik etmiş məmur mediada, sosial şəbəkələrdə daim tənqid hədəfi olub. Yerli əhali onların qanunsuz əməllərindən yuxarı dövlət qurumlarına, eləcə də KİV-ə çoxsaylı şikayətlər ünvanlayıblar.
Namiq Zeynalov icra başçısı kürsüsünü hazırda Suraxanı rayon icra hakimiyyətinin başçısı vəzifəsini tutan Əziz Əziovdan təhvil alıb. O, 2006-2018-ci illər ərzində Cəlilabada rəhbərlik edib. Bu dövrdə adıçəkilən rayon şikayət və müxtəlif qalmaqallarla daim medianın gündəmində olub. Yəqin ki, DTX-nın keçirdiyi əməliyyatdan sonra Namiq Zeynalovla yanaşı Ə.Əzizosun fəaliyyət dövrü də ciddi yoxlanılacaq. Çünki onun rəhbərlik etdiyi 12 il respublikada dəyəri on milyardlarla ölçülən bir neçə dövlət proqramının icra olunduğu illərə təsadüf edir. Bu proqramların bir qismi də Cəlilabadda həyata keçirilib. Yəqin ki, rayonda dövlət siyasətinin necə icra olunduğu, büdcə vəsaitlərinin necə istifadə edildiyi, əhalinin problemlərinin həlli istiqamətində hansı addımların atıldığı istintaqın əsas işlərindən biri olacaq. İstinsna deyil ki, bu çərçivədə rayonun keçmiş başçısı və onun komandası da prosesə cəlb ediləcək və dindiriləcək.
Yeri gəlmişkən, Əziz Əzizov hazırda çalışdığı Suraxanı rayonundan da yaxşı xəbərlər gəlmir. İcra başçsının Cəlilabaddan gətirdiyi kadrlarla, qohum-əqrabası ilə rayonda tam özbaşınalıq rüzgarı əsdirdiyi bildirilir. Məsələn, Suraxanıda tikintiyə icazə ən “gəlirli” sahə olaraq qalır. İcra hakimiyyətinin memarlıq şöbəsi hər kvadrat üçün 50 manat tələb edir. Bu da birmərtəbəli ev üçün 5, ikimərtəbəli tikili üçün 10 min manat rüşvət deməkdir. Rayonda aztəminatlı sakinlərə, şəhid ailələrinin, qazi və müharibə iştirakçılarının problemlərinə biganə münasibət də ciddi narazlıq doğurur. Əziz Əzizovun bu say idarəçiliyi barədə çoxsaylı faktlar yazmaq olar…
Ölkənin başqa rayonlarında da Cəlilabad və Suraxanıdakı vəziyyətdən çox da fərqli idarəçilik yoxdur. Son iki ildə həbs edilmiş 6 icra başçısqının aqibəti onların vəzifədəki həmkarlarına dərs olmayıb. Cəlilabad nümunəsi göstərir ki, icra başçıları dövlət hakimiyyətinin apardığı siyasətə qarşı heyrətamiz dirəniş göstərməkdə davam edirlər. Bu tendensiya isə indiki həssas durumda proqnozlaşdırılmayan hadisələrə səbəb ola bilər.
44 günlük qalibiyyətli Vətən müharibəsindən sonra dövlətin əsas diqqəti şəhid ailələrinin, qazilərin, müharibə iştirakçılarının sosial problemlərini həll etməyə, onları dövlət qayğısı ilə əhatələməyə yönəlib. Sosial şəbəkələrdə yayılan materiallardan da görünür ki, onların əksəriyyəti maddi ehtiyac içərisində olan ailələrdir. Qəhrəmanlarımızın ev, iş, müalicə, müavinət və s. kimi qayğılarının hamısı dövlət tərəfindən qarşılanmalıdır. Prezident İlham Əliyev çıxışlarında bu istiqamətdə dövlət siyasətindən danışarkən bəyan edib ki, hər kəs layiq olduğu şəkildə dəstəklənəcək, bütün problemlər həll olunacaq.
Təcrübə göstərir ki, Azərbaycanda əksər sahələrdə vəziyyəti tənzimləyən, inkişafı stimullaşdıran çox yaxşı dövlət proqramları qəbul olunub. Vətəndaşların sosial rifahinin təmin olunması, infrastruktur problemlərinin həlli, iqtisadi işitrakçılığın səviyyəsinin yüksəldilməsi üçün vacib layihələr həyata keçirilir. Amma bir çox hallarda dövlət siyasətinin icrasına məsul olan qurumların yartımaz fəaliyyəti bu siyasətin effektivliyini aşağı salır. Nəticədə əhali narazı qalır, korrupsiya, rüşvətxorluq baş alıb gedir, infrastruktur layihələri başdansovdu icra edilir və s.
Bu sistemdə ən böyük səlahiyyətlər yerli icra hakimiyyətlərinə məxsusdur. DTX-nın keçirdiyi əməliyyatlar sübut edib ki, məhz onlar dövlət siyasətini sabotaj etməklə şəxsi var-dövlətlərini fantastik səviyyədə artırmağa nail olublar. Amma bundan sonra onların at oynatmasına imkan vermək olmaz. İndi müharibədən çıxmış ölkənin əhalisinə gecə-gündüz xidmət edən icra strukturları və məmurlar vəzifə başında olmalıdırlar.
Bu baxımdan, xüsusi xidmət orqanları tam zamanında hərəkətə keçiblər. Ümid edək ki, qısa müddətdə onların fəaliyyət dairəsi daha da genişlənib nəticədə bu vacib dövlət strukturları korrupsionerlərdən və rüşvətxorlardan təmizlənəcək. (Gununsesi.info)
Daha çox xəbər:
Sabiq icra başçısının həbs müddəti artırılır
Kriminal
Həbsdə olan sabiq icra başçısı məhkəməyə gətirilib — YENİLƏNİB
Kriminal
Kürdəmirin icra başçısı həbs edildi — YENİLƏNİB
Gündəm, Hadisə
Kürdəmir icra başçısının aldığı rüşvətlər açıqlandı — RƏSMİ
Cəmiyyət
Saxlanılan icra başçısı bu maddələrlə ittiham olunur
Kriminal