BÖYÜK YOLUN DAVAMÇISI

31 dekabr Azərbaycan xalqının tarixində ən yadda qalan, ən şərəfli günlərdən biri – Dünya Azərbaycanlılarının Həmrəyliyi Günüdür.
Dünya Azərbaycanlılarının Həmrəyliyi Gününün əsası 1989-cu il dekabrın sonlarında Naxçıvanda sərhədlərin (SSRİ-İran sərhədləri) açılması zamanı qoyulub. 1991-ci ilin 16 dekabrında Naxçıvan Muxtar Respublikası Ali Məclisinin sədri Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəylik Günü elan etdi. Dünya Azərbaycanlılarının Həmrəylik Gününün qeyd edilməsi artıq bütün dünya azərbaycanlıları üçün zərurətə və mənəvi ehtiyaca çevrilib. Ayrı-ayrı ölkələrdə yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində bu gün mühüm rol oynayır.
Artıq iki ildir ki, Milli Həmrəylik Günü tamamilə fərqli, daha yüksək əhvali-ruhiyyə ilə qarşılanır. Çünki torpaqlarımızın işğaldan azad olunması həm də milli həmrəylimizin təntənəsi, xalqımızın öz rəhbəri ətrafında sıx birləşməsinin təcəssümü oldu. 2020-ci il sentyabrın 27-də Ermənistanın ölkəmizə qarşı törətdiyi hərbi təcavüzə cavab olaraq Azərbaycan xalqı Ali Baş Komandan, Prezident İlham Əliyevin çağırışı ilə Vətən müharibəsinə qalxdı. Müzəffər Azərbaycan Ordusu hər anı qəhrəmanlıqlarla dolu 44 gün ərzində düşməni ağır məğlubiyyətə uğratdı və ölkəmizin ərazi bütövlüyünü bərpa etdi. Milli dövlətçilik tariximizdə və xalqımızın yaddaşında əbədi yaşayacaq şanlı Zəfər xalq-iqtidar birliyi, ordumuzun yüksək peşəkarlığı və gərgin siyasi-diplomatik fəaliyyəti sayəsində əldə edildi. Vətən müharibəsində dünyanın bütün ölkələrində yaşayan azərbaycanlılar da yüksək dərəcədə fəallıq göstərdilər, daha sıx birləşdilər. Vətən müharibəsi zamanı xaricdə yaşayan soydaşlarımızın düşmənin məkrli təxribatlarına qarşı etirazları, Azərbaycan həqiqətlərinin dünya ictimaiyyətinə çatdırılması işində fədakar xidmətləri Zəfərimizə layiqli töhfə oldu. Vətən müharibəsi xalqımızın mübarizliyini bütün dünyaya nümayiş etdirdi. Eyni zamanda bu savaşda xalqımız İlham Əliyevin rəhbərliyi ilə milli həmrəyliyin ən mükəmməl nümunəsini yaratdı.
Dövlətimizin və xalqımızın bütövlükdə Azərbaycanımızın hərtərəfli inkişafı, sağlamlığı və rahat yaşaması naminə apardığınız məqsədyönlü böyük islahatlar öz bariz nümunəsini vermiş oldu. Azərbaycan tarixinə İlham Heydər oğlu Əliyev qızıl hərflərlə şanlı bir səhifə yazdı. İşğal altında olan Azərbaycan torpaqları ədalət və haqq savaşı ilə azad olundu.
Cənab Prezident! Qarabağımızın azad olunması Azərbaycan xalqını 28 il cavanlaşdırdı.
“QARABAĞ AZƏRBAYCANDIR” şuarı ilə bizlərə yaşatdığınız əvəzolunmaz sevinc üçün Sizə sonsuz təşəkkürümüzü bildiririk.
Əziz Prezidentimiz!
Ümummilli Lider Heydər Əliyev ideyalarına söykənərək möhkəm dayaqlar üzərində qərar tutan diplomatik siyasətiniz bütün dünyaya Azərbaycanımızın haqq səsini çatdırdı. Həmişə xalqımızın başı üzərində olmağınızın ürəkdən arzu edirəm. Eyni zamanda Sizi təməli Ulu Öndər Heydər Əliyev tərəfindən qoyulmuş “Dünya Azərbaycanlılarının Həmrəylik Günü” və xüsusi olaraq Sizi ad gününüz münasibəti ilə səmimi qəlbdən ən xoş arzularla təbrik edir, sağlıq dolu ömür diləyirik.

Nazim Vəliyev
Ümumdünya Texnologiya Universiteti və YUNESKO- nun Akkreditasiyası üzrə doktor- professor, Rusiya Mühəndislik Akademiyasının həqiqi( xarici) üzvü, əməkdar mühəndis