Elşən Həsənlinin Kürdəmir Rayon İcra Hakimiyyətinin başçısı təyin edilməsi böyük etimadın göstəricisidir

Azərbaycan Respublikasının Prezidenti cənab İlham Əliyevin müvafiq sərəncamı ilə Elşən Həsənlinin Kürdəmir Rayon İcra Hakimiyyətinin başçısı vəzifəsinə təyin edilməsi böyük sevinc və qürur hissi ilə qarşılanıb. Bu təyinat həm dövlət başçısının yerli idarəetmədə səmərəli fəaliyyətə, peşəkarlığa və xalqla birbaşa təmasa xüsusi önəm verdiyinin bariz göstəricisidir, həm də Elşən Həsənliyə olan yüksək etimadın təzahürüdür.
Elşən Həsənli dövlət idarəçiliyində qazandığı təcrübəsi, vətənpərvərliyi və xalqa xidmət prinsipləri ilə tanınan bir şəxsdir. Onun Kürdəmir kimi strateji və kənd təsərrüfatı potensialı yüksək olan bir rayona rəhbər təyin olunması bölgənin sosial-iqtisadi inkişafına, infrastrukturun daha da müasirləşməsinə və əhalinin rifah halının yaxşılaşdırılmasına yeni nəfəs gətirəcək.
Prezident İlham Əliyevin qarşıya qoyduğu əsas hədəflərdən biri bölgələrdə idarəçiliyin effektivliyinin artırılması, vətəndaş məmnunluğunun təmin olunmasıdır. Bu baxımdan, Elşən Həsənlinin rəhbərliyi ilə Kürdəmir rayonunda həyata keçiriləcək layihələrin, sosial proqramların və abadlıq işlərinin yeni mərhələyə qədəm qoyacağına inam böyükdür.
Kürdəmir ictimaiyyəti Elşən Həsənliyə göstərilən bu etimadı yüksək dəyərləndirir və əmindir ki, o, bu məsuliyyətli vəzifənin öhdəsindən layiqincə gələcək, Prezident İlham Əliyevin etimadını əməli fəaliyyəti ilə doğruldacaq.
Yeni təyinat münasibətilə Elşən Həsənlini səmimi qəlbdən təbrik edir, ona dövlətçiliyimizə və xalqımıza xidmət yolunda uğurlar arzulayırıq.

Dilşad Əhmədova
Baş redaktor