“Rüşvətə qarşıyam” deyib rüşvətə görə həbs edilən icra başçısı məhkəməyə çıxarılır

Bu gün Kürdəmir rayonunun sabiq icra başçısı Ceyhun Cəfərovun məhkəməsi keçiriləcək.

“Qafqazinfo”nun verdiyi xəbərə görə, istintaqın vəsatəti əsasında prokuror təqdimat verərək C.Cəfərovun həbsdə qalma müddətinin uzadılmasını istəyib.

Təqdimata bu gün Binəqədi rayon məhkəməsinin hakimi Vüsal Tağıyevin sədrliyi ilə baxılacaq.

C.Cəfərov Cinayət Məcəlləsinin 308.2-ci (vəzifə səlahiyyətlərindən sui-istifadə), 311.3.1-ci (mütəşəkkil dəstə tərəfindən rüşvət alma), 311.3.2-ci (rüşvət alma – təkrar törədildikdə) və 311.3.3-ci (rüşvət alma - külli miqdarda törədildikdə) maddələri ilə ittiham olunur.

C.Cəfərov həbsindən əvvəl keçirdiyi konfransda rüşvətə qarşı olduğunu deyərək, tabeliyindəki rüşvət alan məmurlardan bunun tamamilə yığışdırılmasını istəmişdi: “Dövlət Təhlükəsizliyi Xidməti tərəfindən icra başçıları həbs olunub. Mən istəməzdim bizim rayonumuzda da belə hallar baş versin", - deyə o, çıxışında bildirmişdi.