Türkiyənin Azərbaycandakı səfiri Yüksək Texnologiyalar Parkınında olub — FOTOLAR

Türkiyənin Azərbaycandakı səfiri Erkan Özoral AMEA Yüksək Texnologiyalar Parkının fəaliyyəti ilə tanış olub.
Bu barədə “Ölkə.Az”a YüksəkTexnologiyalar Parkından məlumat verilib.

Bildirilib ki, səfir Yüksək Texnologiyalar Parkının rezidentlərinin fəaliyyəti, laboratoriyaları və istehsal etdiyi məhsullarla tanış olub. Yüksək Texnologiyalar Parkının direktoru Vasif Məmmədov həm Park, həm də rezidentlər, onların fəaliyyət istiqamətləri, istehsal etdiyi məhsullar barəsində türkiyəli diplomata geniş məlumat verib.
AMEA Yüksək Texnologiyalar Parkı Prezident İlham Əliyevin 8 noyabr 2016-cı il tarixli sərəncamı ilə yaradılıb. Yüksək Texnologiyalar Parkının yaradılmasında məqsəd iqtisadiyyatın davamlı inkişafı və rəqabət qabiliyyətinin artırılmasına, müasir elmi və texnoloji nailiyyətlərə əsaslanan innovasiya və yüksək texnologiya sahələrinin genişləndirilməsinə, elmi tədqiqatların aparılmasına və yeni texnologiyaların işlənilməsi üzrə müasir komplekslərin yaradılmasına dövlət dəstəyini daha da artırmaqdır.